علق الفنان محمد فراج على نجاح مسلسله “لعبة جهنم”، الذي حقق انتشارًا واسعًا خلال فترة عرضه عبر منصة “شاهد ام بي سي”.
محمد فراج يشكر صناع “لعبة جهنم” بعد نجاح المسلسل
ونشر محمد فراج صورًا من كواليس العمل، جمعته بعدد من أبطاله، من بينهم الفنانة غادة طلعت والطفل منذر مهران والمخرج مجدي الهواري، ووجه رسالة شكر للجمهور وصناع المسلسل.
وقال فراج: “مش عارف أبدأ منين غير بشكر كبير جدًا على كل الحب وردود الفعل اللي وصلتني من وقت ما “لعبة جهنم” اتعرض، ممتن جدًا إني كنت جزء من رحلة حبيتها وآمنت بيها من أول يوم، اشتغلت على الشخصية دي من قلبي، وأجمل حاجة لأي ممثل إن تعبه يوصل للناس بالشكل ده، شكرًا لكل رسالة وكومنت ولكل حد اتفرج وعاش معانا الحكاية، الحب وصلني وفرق معايا جدًا”.
وتابع: “وشكر كبير لكل زمايلي ولكل فرد في الكرو قدام الكاميرا ووراها، كنت محظوظ إني وسطكم، وشكر خاص للأستاذة دنيا عبد المعبود على فكرة تحويل “القصة الكاملة” من حكايات جرائم حقيقية على يوتيوب لعمل درامي، والفضل ليها في لوك الشخصية إنه يظهر بالشكل اللي شوفتوه ده، ولأستاذ سامح سند صاحب “القصة الكاملة” وصاحب فكرة تقديم وتوثيق الحكايات دي، ولأستاذ مجدي الهواري منتج المشروع اللي تحمس للفكرة وتبناها لحد ما بقت حقيقة، وبشكر من كل قلبي الأستاذ عمرو عبدالله على شغل الـSFX هو والفريق بتاعه اللي بشطارتهم ومجهودهم عملوا فرق كبير في شكل الشخصية ومكياجها عشان تطلع بالشكل اللي شوفتوه، وده بالنسبالي كان جزء أساسي من الشخصية ومعايشتي ليها”.
واختتم حديثه، قائلًا: “شكر كبير لأستاذ إسلام خيري المخرج والأستاذة نجلاء الحديني المؤلفة وأستاذ أحمد جبر مدير التصوير اللي قدروا يحولوا الفكرة لعمل درامي يوصلكم بالشكل ده، وطبعًا شكر كبير لـMBC شاهد البيت اللي احتضن المسلسل ووصّله للجمهور في كل أنحاء الوطن العربي، فخور جدًا بالمسلسل وبكل حد كان جزء منه وممتن لكل الحب اللي أخدناه منكم، الحمد لله، وبالمناسبة أنا شايف كفاية سايكودراما لحد كده، المرة الجاية يا رومانسي يا كوميدي، ولا إنتوا مبسوطين بعذابي ده”.
أحداث وأبطال “لعبة جهنم”
تدور أحداث حكاية “لعبة جهنم” حول مراهق عبقري يبدو مثاليًا، ورجل يبدو متدينًا، تتقاطع حياتهما عبر الإنترنت، قبل أن تتحول علاقتهما إلى لعبة تتجاوز العالم الافتراضي، وتدفع تحركاتهما الرقمية نحو جريمة تمتد تداعياتها إلى الواقع.
وتأتي “لعبة جهنم” كأولى حكايات سلسلة “القصة الكاملة”، التي تعتمد على تقديم حكاية جديدة كل شهر في 3 حلقات متتابعة، مستوحاة من وقائع وملفات وتحقيقات حقيقية، مع إعادة تقديمها في قالب درامي.
ويشارك في بطولة “لعبة جهنم” كل من محمد فراج، وعمر رزيق، ومنذر مهران، وغادة طلعت، وكريمة منصور، وياسر عزت، والعمل من إخراج إسلام خيري وتأليف نجلاء الحديني.
