رد المخرج خضر محمد خضر على الانتقادات التي وُجهت له بعد وفاة طليقته ياسمين سيف أبو النجا، ابنة الفنانة نجلاء فتحي.
تعليق خضر محمد خضر
كتب خضر عبر حسابه الرسمي على فيسبوك: “على فكرة أنا بعرف أرد كويس وبعرف أحكي كويس، يعني أنا مستعد أحكيلكم عادي عن أسرار بيوتنا اللي ماحدش يعرفها غير المقربين مننا”.
وأضاف: “وممكن أحكيلكم عن علاقتي الزوجية أنا وياسمين من بعد ما خلفنا ومن ساعة ما دكاترة فرنسا حذرونا من الحمل مرة تانية، وممكن أحكيلكم عن بداية النهاية من سبتمبر ٢٠٢٤ بعد ١٨ سنة جواز، وممكن أحكيلكم مين أجبرني أنا وياسمين على الطلاق بالعافية، وإيه السبب وليه ياسمين ماعرفتش تقف قدام القوة القهرية دي”.
وتابع: “وممكن أحكيلكم مين أجبرها تسيب البيت ٤ أشهر وماترجعش غير لما نتطلق وبقيت أنا عايش لوحدي ٤ أشهر في بيتنا وبنتي عايشة ٤ أشهر مع امي وهي عايشة ٤ أشهر إجباري في بيت تالت”.
وأضاف: “وممكن أحكيلكم أنا وياسمين كنا بنتقابل في الشارع اللي ورا بيتهم في السر إزاي عشان ترجع البيت وفشلنا برضه بسبب القوة القهرية دي، وممكن أحكيلكم عن صداقتي أنا وياسمين وعلاقتنا بعد الطلاق لما رجعت بيتنا وأنا مشيت وقعدت جنب أمي عشان كانت بتتعالج من السرطان، وممكن أحكيلكم عن مكالماتنا أنا وياسمين ورسايلنا كل يوم وزياراتنا كل أسبوع”.
وتابع: “وممكن أحكيلكم أنا ليه اتجوزت بعد الانفصال ب ١٣ شهر وعملت فرح بالرغم إن مراتي ماكانش فارق معاها نعمل فرح.. وياسمين كانت على علم وزين حضرت الفرح بدون أي مشاكل أو نفسيات”.
واستكمل: “مراتي اللي إنتوا نازلين فيها تجريح وتقطيع بدون ذنب.. زي ما نزلتوا تجريح في ياسمين بدون ذنب لما طلعت معايا في مهرجان الجونة وسخرتوا منها عشان ماكانش عاجبكم شكلها واتريقتوا عليها ودمرتولها نفسيتها لمجرد إنها مش شبه أمها.. لدرجة إنها حلفت ما تطلعش في مهرجانات تاني من ساعتها.. ولا نسيتوا؟ كومنتاتكم وجرحكم ليها وسخريتكم منها وألفاظكم النبيلة لسه موجودة على الفيسبوك على فكرة”.
هجوم الجمهور على خضر محمد خضر
تعرض المخرج خضر محمد خضر لانتقادات من عدد من رواد مواقع التواصل الاجتماعي، بعدما اتهمه البعض بالتخلي عن طليقته في أزمة مرضها.
وفاة ياسمين أبو النجا
توفيت ياسمين أبو النجا، ابنة الفنانة نجلاء فتحي، بعد تعرضها لأزمة قلبية يوم الأحد الماضي.
