وجه الملحن والموزع الموسيقي سامر أبو طالب رسالة مؤثرة لنجله مالك، بعد مرور خمسة أشهر على فراقهما. وكتب أبو طالب عبر حسابه على “إنستجرام”: “مالك حبيبي وصاحبي وابني وأول فرحتي وروح قلبي، علشانك أستحمل الدنيا تشيل وتحط فيا، مش بس يتشهر بيا ويتقال عني كلام من أوقح الكلام اللي ممكن يتقال عن بني آدم زيي معروف عنه الاحترام والكرم وبيتقى ربنا في كل شيء”.
وأضاف: “عايز أقولك يا مالك إني ماكنتش أحب تكبر وتلاقي العلاقة كده بين أمك وأبوك، واصلة للمحاكم والكل بينشر ويعيد ويزيد فيها، وعشان إيه…؟ عشان أغنية تطلع تريند؟ ولا شوية دعاية أقل ما يقال عنها إنها دعاية رخيصة وشو مالوش قيمة”.
وتابع: “أنا من بداية الأزمة قررت إني عمري ما هعمل فيك كده وهفضل ملتزم الصمت تماماً، لأني مش من الشخصيات اللي بتحب الدوشة والمشاكل والقيل والقال. سكوتي عن حقي وشتيمتي وإهانتي أنا وأسرتي كان عشانك يا حبيبي، عشانك أنت وبس يا مالك”.
واستكمل: “محروم منك، وبقالي خمسة شهور مش بشوفك عشان بس العند ولأن الحضانة مع مامتك، ومع ذلك ما تكلمتش ولا حاولت أعمل شوشرة، وفوضت أمري لله في أموري كلها، وقلت إن شاء الله ربنا قادر يغير الأحداث للأحسن”.
واختتم حديثه قائلاً: “ردي هيكون رد قانوني على كل الإشاعات ومحاسبة كل من شارك فيها، لأني مش محتاج أعمل تريند على حساب ابني، اللي هيكبر يلاقي أمه بتشهر بأبوه بالكدب وبدون وجه حق، وفي الآخر تقولك، دي لعبة محامي وأنا ماليش دعوة، وكأنها بأعصاب باردة بتنقذ نفسها لكنها بتضيع ابنها، ولنا الله يحكم في عباده، ويارب يجي اليوم اللي نفوق فيه من حب الشهرة والتريند ولو على حساب ولادنا”.
كواليس انفصال سامر أبو طالب ورنا سماحة
وكانت رنا سماحة قد أعلنت انفصالها رسميًا عن زوجها الملحن سامر أبو طالب في يناير 2025 بعد زواج دام نحو خمس سنوات أثمر عن طفلهما “مالك”. وقد رفعت رنا سماحة دعوى خلع ضد سامر أبو طالب بعد تراكم الخلافات منذ السنة الأولى للزواج وفشل محاولات الصلح الودية. وبعد الانفصال، أعلن سامر أبو طالب خطوبته من خارج الوسط الفني في سبتمبر 2025.
