احتفل الشاعر مصطفى حدوتة بإطلاق أغنيته الجديدة “نوغا” التي تغنيها النجمة هيفاء وهبي، حيث تم طرحها منذ ساعات عبر القناة الرسمية لهيفاء على يوتيوب وعلى صفحات مواقع التواصل الاجتماعي. ويعتبر هذا العمل هو الأول من نوعه الذي يجمع بين حدوتة ووهبي.
نشر حدوتة مقطع فيديو عبر حسابه على “إنستجرام”، حيث ظهر وهو يشاهد كليب “نوغا”، وكتب معلقًا: “باركولي يا جماعة انا اشتغلت مع الكراش”.
في سياق آخر، انتقد مصطفى حدوتة تصريحات الإعلامية بسمة وهبة، التي تحدثت عنه بطريقة غير لائقة، وفقًا لما ذكره في مقطع فيديو نشره على صفحته على “فيسبوك”. حيث قال: “اللي بيحصل معايا مش طبيعي، بسمة وهبة في برنامجها بتقول انا حبست مصطفى حدوتة في الاوضة وقلت له مش هتطلع لحد ما تخلص الأغنية، انا مش متذكر احنا الموضوع من 6 7 سنين وانا كنت هناك وحسن شاكوش وإسلام ساسو وممكن أكون طلبت منها أكون في اوضة لوحدي عشان الدوشة عشان كنا بنعمل أغنية جوه بيتها لبرنامجها، بس اللي انا واثق منه ان محدش هيتكلم عليا بأسلوب غير لائق وانا هديله الأغنية”.
مصطفى حدوتة يعلق على تصريحات تامر عبد المنعم
رد الشاعر مصطفى حدوتة على تصريحات الفنان تامر عبد المنعم، التي قال فيها: “مش معنى إنك اشتغلت مع عمرو دياب تبقى أحمد شوقي”، وذلك بعد تعاون حدوتة مع الهضبة في ألبومه الجديد “حبيتك” من خلال ثلاث أغنيات هي: “الألوان”، و”وإنتي جنبي”، و”12 بالليل”.
وقال مصطفى حدوتة في مقطع فيديو نشره عبر حسابه الرسمي على “إنستجرام”: “الفنان تامر عبد المنعم طلع قال عني مش عشان اشتغلت مع عمرو دياب أبقى أحمد شوقي، أنا ولا فاكر نفسي أحمد شوقي ولا عايز أبقى ولا أكون أحمد شوقي، أنا فاكر نفسي مصطفى حدوتة وعايز أكون مصطفى حدوتة ومش عايز أكون حد غير مصطفى حدوتة”.
وأضاف: “الوصول لعمرو دياب صعب جدا، وأنا ناجح من قبل عمرو دياب ونجحت معاه، وبشتغل مع ناس تانية وناجح معاهم، ومقدرش أقول لحضرتك إنك منجحتش غير لما قلدت عمرو دياب”.
وتابع: “مصر كلها عارفة إن حضرتك منجحتش غير لما قلدت عمرو دياب، ومقدرش أنتقص من دورك وإنك تشخص شخصية حد تاني، دي حاجة صعبة جدا ومش أي حد يعرف يعملها، وبرافو إنك عرفت تعمل كده، ولكن أصعب حاجة تعرف تعملها دلوقتي إنك تقول برافو”.
واختتم حديثه قائلا: “كان أوفر عليك إنك تقول برافو، لأني شاب في بداية حياتي وعملت حاجات كتير بإيدي ومجهودي ووقتي، بس دايما كلمة مبروك أصعب كلمة الناس تقولها”.
